ކުނި މެނެޖް ކުރުމުގެ ދާއިރާގެ ޤާނޫނާއި، ޤަވާޢިދުތަކާއި، ސިޔާސަތުތައް
ތިމާވެށި ރައްކާތެރި ކުރުމާއި ހިމާޔަތް ކުރުމުގެ ޤާނުނު އުފައްދާފައި ވަނީ 1993 ވަނަ އަހަރު “އެންވަޔަރަންމަންޓް ޕްރޮޓެކްޝްން އެންޑް ޕްރިޒަވޭޝަން އެކްޓް ނަންބަރު 93/4” ގެ ނަމުގައެވެ. މިޤާނޫނުގައި، ތިމާވެށި އެންމެ ފައިދާ ހުރި ގޮތުގައި ބޭނުން ކުރުމާއި ދެމެހެއްޓޭނެ ގޮތުގެ މައިގަޑު އަސާސް ތައް ހިމަނައިފައި ވެއެވެ. އެންވަޔަރަންމަންޓް ޕްރޮޓެކްޝްން އެންޑް ޕްރިޒަވޭޝަން އެކްޓް ތަންފީޒު ކުރުމުގެ ބާރު އަދި އޭގެ ދަށުން ހެދޭ ސިޔާސަތު ތަކާއި، ޤަވާޢިދުތައް ހެދުމުގެ ބާރު ދީފައިވަނީ މިނިސްޓްރީ އޮފް އެންވަޔަރަންމަންޓް އަށެވެ.
ކުނި މެނެޖް ކުރުމުގެ ޤައުމީ ސިޔާސަތު ކަނަޑައަޅައި ސަރުކާރުން ޢާންމު ކުރެއްވީ 2008 ވަނަ އަހަރުއެވެ. މި ސިޔާސަތު އަލުން މުރާޖާކޮށް 2015 ވަނަ އަހަރު އާންމު ކުރެވުނެވެ. މި ސިޔާސަތުން ހާމަވާ ގޮތުގައި، ކުނި މެނެޖް ކުރުމަށް ކުރެވިފައި ހުރި މަސައްކަތް މަދުކަމާއި އެކު ނަތީޖާ އެއްގެ ގޮތުން ކުނި މެނެޖް ކުރުމަށް ހުރި ވަޞީލަތް ތަކާއި ޤާބިލުކަން ދަށްކަން ފާހަގަ ކުރެއެވެ.
ކުނި މެނެޖް ކުރުމުގެ ޤަވާޢިދު 2013/R-58 ގެޒެޓް ކުރެވުނީ 5 އޯގަސްޓް 2013 ވަނަ އަހަރު އެވެ. މި ޤަވާއިދު ތަންފީޛު ކުރުމުގެ އެންމެހައި ބާރު ލިބިގެންވަނީ އެންވަޔަރަންމަންޓް ޕްރޮޓެކްޝަން އެޖެންސީއަށެވެ. މި ޤަވާއިދުގައި މައިގަޑު މުހިންމު 5 ބަޔެއް ވެއެވެ. 1. ކުނި މެނެޖް ކުރުމުގެ މިންގަނޑުތައް: އެއްގަމާއި ކަނޑުމަގުން ކުނި އުފުލުމުގެ މިންގަނޑުތައް، ކުނި ޓްރީޓްކުރުމާއި، ކުނި ގުދަންކުރުމުގެ މިންގަނޑުތައް، ކުނި ކޮށި ބެލެހެއްޓުމުގެ މިންގަނޑުތައް، ލޭންޑް ފިލްގައި ހުންނަން ޖެހޭ މިންގަޑުތައް، އަދި ނުރައްކާތެރި ކުނި މެނެޖް ކުރުމުގެ މިންގަޑުތަކެވެ. 2. ކުނި މެނެޖް ކުރުމުގެ ހުއްދަ: ހުއްދަ ނަގަން ޖެހޭ ކަންތައްތަކުގެ ތެރޭގައި، ކުނި ނެގުމުގެ ހުއްދަ، އެއްގަމާއި ކަނޑުމަގުން ކުނި އުފުލުމުގެ ހުއްދަ، ކުނި ޓްރީޓް ކުރުމުގެ ހުއްދަ، ކުނި ގުދަން ކުރުމުގެ ހުއްދަ، ކުނި އަޅާ ތަންތަން ބެލެހެއްޓުމުގެ ހުއްދަ، ލޭންޑްފިލް ގެ މަސައްކަތްތަކުގެ ހުއްދަ، އަދި ނުރައްކާތެރި ކުނި ގެންގުގުޅުމުގެ ހުއްދަ ހިމެނެއެވެ. 3. އެއްތަނުން އަނެއްތަނަށް ކުނި އުފުލުން، 4. މަޢުލޫމާތު ފޯރުކޮށްދިނުމާއި ރިޕޯޓްކުރުން ، އަދ 5. ފިޔަވަޅު އެޅުން



